Upphafið
Komið þið sæl. Við erum Myrra Rós og Júlíus Óttar, hjónin sem standa á bak við framleiðslu Fjaðrafok. Við fluttum úr höfuðborginni þegar Júlíus hóf störf hjá föður sínum við orgelsmíði, viðhald og viðgerðir þeirra.
Ég hafði hins vegar ekki vinnu að ganga í svo ég byrjaði að hanna fyrsta vængja parið á orgelverkstæðinu hans Björgvins Tómassonar tengdapabba. Þar má segja að Fjaðrafok hafi tekið á flug.
VINNustofa á Stokkseyri
Vinnustofan okkar er staðsett í Orgelsmiðju Björgvins Tómassonar á Stokkseyri en Júlíus vinnur á sama stað. Björgvin var svo góður að leyfa mér að hreiðra um mig á vinnuborði við glugga á verkstæðinu, með útsýni út á bryggjuna og hafið hér við ströndina. Hér sveima hrafnar og hinir margvíslegu fuglar dag hvern og veita innblástur í smíðina.
Vængirnir
Grunnur vængjanna er unnin úr mismunandi viðartegundum, þó aðallega birki og furu. Fjaðrirnar eru unnar úr hnotu, mahóní og birki.
Efniviðurinn í vængina er afgangsviður sem fellur til í Orgelsmiðjunni og einnig efni sem við fáum oft gefins frá öðrum aðilum sem geta ekki nýtt afganga. Hvert par af vængjum frá okkur er einstakt þar sem hvert og eitt er handgert frá upphafi til enda. Frá mótun grunnsins til fjaðranna sem einnig eru mótaðar, límdar og litaðar í höndunum.
